ညက ကစားခဲ့သွားတဲ့ ပရီးမီးယားလိဂ် ပွဲစဉ်မှာတော့ ချဲလ်ဆီးတို့ စတန်းဖို့ဒ်ဘရစ်ချ်မှာ အိမ်မက်ဆိုး မက်ခဲ့ရပြီး မန်ချက်စတာယူနိုက်တက် ကတော့ အောင်ပွဲခံနိုင်ခဲ့ပါတယ်။ မန်ချက်စတာယူနိုက်တက်ရဲ့ ၁-၀ ရလဒ်နဲ့ အနိုင်ရရှိမှုဟာ ကြည့်ကောင်းတဲ့ ပွဲစဉ်တစ်ပွဲ မဟုတ်ခဲ့ပေမယ့် ချန်ပီယံလိဂ် ဝင်ခွင့် တိုက်ပွဲ အတွက်တော့ အရေးပါတဲ့ ရလဒ် ဖြစ်ခဲ့ပါတယ်။
ဒီနိုင်ပွဲကြောင့် မန်ချက်စတာယူနိုက်တက်ဟာ လာမယ့်ရာသီ ဥရောပရဲ့ အဆင့်မြင့်ဆုံး ပြိုင်ပွဲမှာ ပါဝင်ခွင့် ရဖို့ အခြေအနေ ကောင်းသွားပြီး ချဲလ်ဆီး ကတော့ အဆင့် (၆) နေရာမှာ ရပ်တည်နေကာ ပြိုင်ဘက်တွေနဲ့ အလှမ်းဝေးသွားခဲ့ပါတယ်။ လက်ရှိမှာ ယူနိုက်တက်ဟာ ချဲလ်ဆီးထက် ၁၀ မှတ် ဖြတ်ထားနိုင်ပြီး ပရီးမီးယားလိဂ် ပွဲစဉ် ၅ ပွဲသာ ကျန်ရှိတော့တဲ့ အတွက် ချန်ပီယံလိဂ် အတွက် စတင် ပြင်ဆင်နိုင်ပြီ ဖြစ်ပါတယ်။ တစ်ဖက် မှာတော့ လီယမ် ရိုစီနီယာရဲ့ ချဲလ်ဆီး ကတော့ ပရီးမီးယားလိဂ် ၄ ပွဲဆက် ရှုံးခဲ့တဲ့ အပြင် ပြိုင်ပွဲစုံ ၇ ပွဲမှာ ၆ ပွဲအထိ ရှုံးနိမ့်ထားတဲ့ အတွက် အခြေအနေ ဆိုးရွားနေပါပြီ။
ဒီပွဲကနေ ရရှိလာတဲ့ စိတ်ဝင်စားစရာ အချက်အလက် (၄) ချက်ကို ဖော်ပြပေးရမယ် ဆိုရင်တော့
၁။ လီယမ် ရိုစီနီယာ အပေါ် ဖိအားတွေ ပိုမို မြင့်တက်လာခြင်း
စနေနေ့က ပွဲစဉ်ရဲ့ ပထမပိုင်းနဲ့ ပွဲအပြီးမှာ ချဲလ်ဆီး ပရိသတ်တွေက ကိုယ့်အသင်းကိုယ် လှောင်ပြောင်ခဲ့ကြပါတယ်။ ပွဲမစခင် ကတည်းက အသင်းပိုင်ရှင်တွေကို ကန့်ကွက် ဆန္ဒပြမှုတွေ ရှိခဲ့တာကြောင့် ချဲလ်ဆီး အတွက်တော့ စိတ်ပျက်စရာ ညနေခင်း တစ်ခု ဖြစ်ခဲ့ပါတယ်။ ချဲလ်ဆီးဟာ အရင်ပွဲတွေလောက် အခြေအနေ မဆိုးခဲ့ဘဲ ဖိအားပေးနိုင်တဲ့ အချိန်တွေ ရှိခဲ့ပေမယ့် တိုက်စစ်ပိုင်း အဆုံးသတ် အားနည်းမှုက စိုးရိမ်စရာ ဖြစ်နေဆဲပါ။ ခံစစ် အားနည်းနေတဲ့ ယူနိုက်တက်ကို ရင်ဆိုင်ခဲ့ရပေမယ့် ဂိုးပေါက်တည့်မှု ၃ ကြိမ်သာ ရှိခဲ့ပြီး ဂိုးရလုနီးပါး အခွင့်အရေး တစ်ကြိမ်မှ မဖန်တီးနိုင်ခဲ့ပါဘူး။ ၄ ပွဲ ဆက်တိုက် ဂိုးမသွင်းနိုင်ဘဲ ရှုံးနိမ့်ထားတဲ့ အတွက် နည်းပြ ရိုစီနီယာ အနေနဲ့ အသင်းကို အမြန်ဆုံး အဖတ်ဆယ်မပေးနိုင်ရင် ပရိသတ်တွေရဲ့ ဖိအားပေးမှုတွေ ပိုမိုကြီးမားလာတော့မှာ ဖြစ်ပါတယ်။
၂။ ခံစစ်အကြပ်အတည်းကို ကျော်ဖြတ်နိုင်ခဲ့ခြင်း
မာတီနက်ဇ်၊ မက်ဂွိုင်းယား တို့က ပွဲပယ်ကြောင့် လွဲချော်ခဲ့ပြီး ဒီလစ်ဂျ် ကလည်း ဒဏ်ရာကြောင့် မပါနိုင်ခဲ့သလို နောက်ဆုံးမှာ လန်နီ ယိုရိုပါ ဒဏ်ရာရသွားခဲ့တာကြောင့် ယူနိုက်တက်ရဲ့ ခံစစ်ဟာ ပရမ်းပတာ ဖြစ်ခဲ့ပါတယ်။ အသင်းရဲ့ အဓိက ဗဟိုနောက်ခံလူ ၅ ဦးထဲက ၄ ဦး အထိ မပါနိုင်တဲ့ အခြေအနေမှာ နူဆာ မက်ဇရာရီနဲ့ လူငယ် ကစားသမား အေဒင် ဟဲဗန်း တို့ကို တွဲဖက် ကစားစေခဲ့ပါတယ်။
ဒီခံစစ်အတွဲဟာ အထူးသဖြင့် လူငယ်လေး ဟဲဗန်း အတွက် ပွဲအစပိုင်းမှာ အနည်းငယ် ရုန်းကန်ခဲ့ရပေမဲ့ ပွဲကစားချိန် ကြာလာတာနဲ့အမျှ အစွမ်းပြနိုင်ခဲ့ပါတယ်။ မက်ဇရာရီနဲ့ ဟဲဗန်းတို့ဟာ ခံစစ်ပိုင်း ကူညီမှု ၁၃ ကြိမ် အထိ ပြုလုပ်ခဲ့ပြီး ချဲလ်ဆီးရဲ့ တိုက်စစ်ကို ကောင်းကောင်း ထိန်းချုပ်နိုင်ခဲ့ပါတယ်။
၃။ ဘရူနို ဖာနန်ဒက်စ်ရဲ့ ထူးခြားတဲ့ စွမ်းဆောင်ရည်
အသင်း အတွက် လိုအပ်တဲ့ အချိန်တိုင်းမှာ ဘရူနို ဖာနန်ဒက်စ်က အမြဲရှိနေတတ်ပါတယ်။ ဒီပွဲမှာ သူဟာ အသင်းရဲ့ နှလုံးသည်းပွတ် သဖွယ် ကစားခဲ့ပြီး ဒီရာသီ ပရီးမီးယားလိဂ်ရဲ့ ၁၈ ကြိမ်မြောက် ဂိုးဖန်တီးမှုကို ပြုလုပ်နိုင်ခဲ့ပါတယ်။ အဆိုပါ စံချိန်ဟာ သီယာရီ အွန်နရီနဲ့ ဒီဘရွန်းနားတို့ တင်ထားတဲ့ တစ်ရာသီ အတွင်း အများဆုံး ဂိုးဖန်တီးမှု အကြိမ် ၂၀ စံချိန်ကို မှီဖို့ နီးစပ်နေပြီ ဖြစ်ပါတယ်။ ဒီပွဲမှာ အခွင့်အရေး ၅ ကြိမ် အထိ ဖန်တီးပေးခဲ့တဲ့ သူ့ကို ပွဲစဉ်ရဲ့ အကောင်းဆုံး ကစားသမားဆု ပေးအပ်ခဲ့တာဟာ ငြင်းစရာ မရှိပါဘူး။ လက်ရှိ ခြေစွမ်းအရ သူဟာ တစ်ရာသီလုံးရဲ့ အကောင်းဆုံး ကစားသမားဆု အတွက်လည်း ထိုက်တန်သူ ဖြစ်နေပါတယ်။
၄။ အန်ဇို ဖာနန်ဒက်စ် ပြန်လည်ပါဝင်လာခြင်းအသင်းတွင်း စည်းကမ်းပိုင်းကြောင့် ၂ ပွဲ ပွဲပယ်ခံထားရတဲ့ အန်ဇို ဖာနန်ဒက်စ်ဟာ ဒီပွဲမှာ လူစာရင်းထဲ ပြန်လည် ပါဝင်လာခဲ့ပါတယ်။ နည်းပြ ရိုစီနီယာက သူ့ကို ပွဲထွက်လူစာရင်းမှာ တန်းထည့်ခဲ့ပြီး အန်ဇိုဟာ ကွင်းလယ်မှာ ကစားကွက်ဖော်ပေးသူ အဖြစ် ခြေစွမ်းပြခဲ့ပါတယ်။ ချဲလ်ဆီး ရှုံးနိမ့်ခဲ့ပေမယ့် အန်ဇိုဟာ ချဲလ်ဆီး အသင်းသားတွေထဲမှာ ဂုဏ်ယူဝင့်ကြွားစွာ ထွက်ခွာနိုင်ခဲ့သူ တစ်ဦးပါ။ သူဟာ အခွင့်အရေး ဖန်တီးမှု (၅ ကြိမ်)၊ တိုက်စစ်ဇုန် အတွင်း ဘောလုံးပေးပို့မှု (၁၇ ကြိမ်) နဲ့ မျှော်လင့်ထားတဲ့ ဂိုးအရေအတွက် (၀.၃၇) တို့မှာ အသင်းရဲ့ အမြင့်ဆုံး စာရင်းမှာ ရှိခဲ့ပါတယ်။ သူ ပြန်ပါလာတာက ချဲလ်ဆီးရဲ့ ဖန်တီးမှုပိုင်းကို ပိုမိုအားကောင်းလာစေတာ သိသာခဲ့ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
