“ The Special One” လို့ နာမည်ကျော်တဲ့ ပေါ်တူဂီ လူမျိုး မန်နေဂျာကြီး ဟိုဆေး မော်ရင်ညို ကတော့ ဘာနေဗျူးကွင်းကြီးဆီကို အောင်မြင်မှုတွေ ပြန်ယူဆောင်ပေးဖို့ အတွက် နောက်ထပ် တစ်ကြိမ် ပြန်လည် ရောက်ရှိလာခဲ့ပြီ ဖြစ်ပါတယ်။ လာလီဂါ ထိပ်သီး ရီးရဲလ်မက်ဒရစ်ရဲ့ အဝတ်လဲခန်း အတွင်းက ကွဲအက်မှုတွေကို ပြန်လည် ပြင်ဆင်ဖို့ အတွက် မော်ရင်ညိုမှာ အစီအစဉ် တစ်ခု ရှိနေတယ်လို့လည်း သိရပါတယ်။ ဒါဟာ ကွင်းတွင်း ကွင်းပြင်ပ ပြဿနာတွေ၊ ခိုက်ရန် ဖြစ်ပွားမှုတွေကို ရှောင်လွှဲနိုင်ဖို့ “ ပွင့်လင်းပြီး ရိုးသားတဲ့ ဆွေးနွေးမှုမျိုး” ကို ကစားသမားတွေနဲ့ ပြုလုပ်သွားဖို့ စီစဉ်နေတာလည်း ဖြစ်ပါတယ်။
တကယ်တော့ လော့စ်ဘလန်ကို့စ် တို့ရဲ့ ၂၀၂၅-၂၆ ဘောလုံးရာသီဟာ ဆုဖလား လက်မဲ့ ဖြစ်ခဲ့ရုံတင်မကဘဲ နောက်ကွယ်က ကစားသမား အချင်းချင်း ရန်ပွဲတွေကြောင့်ပါ အတော်လေးကို ပရမ်းပတာ ဖြစ်ခဲ့ရတာပါ။ ကီလီယန် အမ်ဘာပေးက မန်နေဂျာဟောင်း အာဘီလိုအာနဲ့ အဆင်မပြေ ဖြစ်ခဲ့သလို၊ အန်တိုနီယို ရူဒီဂါက အယ်လ်ဗာရို ကာရီးရပ်စ်ကို ပါးရိုက်ခဲ့တာမျိုးတွေ ရှိခဲ့ပါတယ်။ ပိုဆိုးတာက အော်ရီလီယန် ချူအာမေနီနဲ့ ဖက်ဒရီကို ဗယ်လ်ဗာဒီတို့ ထိပ်တိုက် တွေ့ခဲ့တဲ့ ပြဿနာမှာ ဆိုရင် ဥရုဂွေး ကွင်းလယ်လူ ဗယ်လ်ဗာဒီဟာ ဆေးရုံတောင် တက်ခဲ့ရပါတယ်။
ဒီလို ဆိုးရွားလွန်းတဲ့ ရာသီကို အစဉ်အလာ ပြိုင်ဘက် ဘာစီလိုနာကို အနိုင်ယူပြီး ပရိသတ်တွေကို ချွေးသိပ်ဖို့ ကြိုးစားခဲ့ပေမယ့်လည်း အဲလ်ကလက်ဆီကိုမှာ ၂-၀ နဲ့ ထိုက်ထိုက်တန်တန် ရှုံးနိမ့်ခဲ့ပါတယ်။ ဒီလို ခြေစွမ်းမပြနိုင်တဲ့ ပွဲစဉ်အပြီး မှာတော့ ဥရောပ ချန်ပီယံ ၁၅ ကြိမ်ဖြစ်ခဲ့တဲ့ အသင်းကြီးရဲ့ အမာခံ ပရိသတ်တွေတောင် အသင်းပေါ် စိတ်ပျက်လက်ပျက် ဖြစ်ခဲ့ကြရပါတယ်။
ဒါပေမယ့် မော်ရင်ညိုရဲ့ တစ်ကျော့ပြန် ရောက်ရှိလာမှုကတော့ လာလီဂါ ကလပ် အတွက် သမိုင်းသစ် တစ်ခု (သို့) ရင်းနှီးပြီးသား အစပြုခြင်း တစ်ခု ဖြစ်လာနိုင်ပါတယ်။ ဒီအချိန်မှာ မော်ရင်ညို ကတော့ အသင်းကို ရွှံ့နွံထဲကနေ ဘယ်လိုပြန်ဆွဲတင်ရမလဲဆိုတဲ့ ပထမဆုံးခြေလှမ်းကို အသေအချာ သိနေပုံ ရပါတယ်။
ရီးရဲလ်မက်ဒရစ်ကို အောင်ပွဲလမ်းကြောင်းပေါ် ပြန်တင်မယ့် မော်ရင်ညိုရဲ့ အစီအစဉ်
ဘာနေဗျူးမှာ ပရိသတ်တွေနဲ့ ဘုတ်အဖွဲ့ရဲ့ စိတ်ရှည်မှုက ကုန်ဆုံးနေပါပြီ။ ၂၀၂၄-၂၅ ရာသီမှာ အမ်ဘာပေး ပီအက်စ်ဂျီ ကနေ ပြောင်းရွှေ့လာပြီးကတည်းက ရီးရဲလ်မက်ဒရစ်ဟာ အဓိက ဆုဖလားကြီး တစ်ခုမှ မရရှိသေးတာမို့ မော်ရင်ညို အနေနဲ့ အသင်းကို ပြန်လည် တည်ဆောက်ဖို့ အချိန်အများကြီး ရမှာ မဟုတ်ပါဘူး။
ကမ္ဘာ့အကြီးဆုံး အသင်းကြီးရဲ့ ကွင်းတွင်းကွင်းပ ပြဿနာတွေ အပြင် အမ်ဘာပေး ရှိနေလျက်နဲ့ အသင်း ဘာလို့ ရုန်းကန်နေရလဲဆိုတဲ့ မေးခွန်းအပေါ် မော်ရင်ညိုက အေးအေးဆေးဆေးပဲ တုံ့ပြန်ခဲ့ပါတယ်။ “ကျွန်တော့် မျက်စိနဲ့ ကိုယ်တိုင် မြင်အောင် ကြည့်ရဦးမယ်။ လက်ရှိအချိန်မှာ ကျွန်တော် မသိသေးတဲ့ အရာတွေကို နားလည်အောင် အရင်လုပ်ရမယ်။ အခုလောလောဆယ် ကျွန်တော် သိတာတွေက မီဒီယာတွေမှာ ဖတ်ရတာ၊ တီဗီမှာ ကြည့်ရတာတွေပဲ ရှိသေးတာလေ။ ကျွန်တော် ကစားသမားတွေကို အရင်ဆုံး သိအောင်လုပ်ရမှာပါ။” လို့ မော်ရင်ညိုက Vanity Fair ကို ပြောကြားခဲ့ပါတယ်။
“အခုအချိန်က စကားတွေ အများကြီး ပြောနေရမယ့် အချိန်မဟုတ်ပါဘူး။ အရမ်း အေးအေးဆေးဆေးနဲ့ အခြေအနေကို သုံးသပ်ရမယ့် အချိန်၊ ကစားသမားတွေနဲ့ စကားပြော၊ မေးခွန်းတွေ မေး၊ ပြန်ဖြေပြီး ပွင့်လင်း ရိုးသားတဲ့ ဆွေးနွေးမှုမျိုး လုပ်ရမယ့် အချိန်ပါ။ ဘာလို့လဲ ဆိုတော့ နောက်ဆုံးမှာ ကျွန်တော် လုပ်ချင်တာက ကစားသမားတွေကို ပိုကောင်းလာအောင် ကူညီပေးဖို့၊ အသင်းကို ပိုတိုးတက်အောင် လုပ်ပေးဖို့နဲ့ ကလပ် အသင်းကြီးကို ပိုကောင်းလာအောင် ဝိုင်းဝန်း ကြိုးစားပေးဖို့ပဲ ဖြစ်ပါတယ်။ ကျွန်တော်က လူတိုင်းကို ကူညီဖို့ ရောက်လာတာပါ။ ဝေဖန်ဖို့ မဟုတ်ဘူး၊ စကားတွေ လျှောက်ပြောဖို့ မဟုတ်ဘူး၊ နားထောင်ပေးဖို့ပါ။ ကီလီယန် အမ်ဘာပေးနဲ့ ပတ်သက်ပြီး ကျွန်တော် ပြောနိုင်တာ တစ်ခု ကတော့ သူဟာ ထူးခြားပြောင်မြောက်တဲ့ ကစားသမား တစ်ယောက် ဖြစ်ပြီး သူ့ကို လက်ရှိထက် ပိုကောင်းလာအောင် ကျွန်တော် အစွမ်းကုန် ကူညီပေးသွားမှာပါ။” လို့ မော်ရင်ညိုက ဆိုပါတယ်။
ရီးရဲလ်မက်ဒရစ် အပေါ် အရိပ်မည်းကြီးလို လွှမ်းမိုးနေတဲ့ “ အမ်ဘာပေး ပြဿနာ”
အသင်းကို ရောက်လာတဲ့ မာ့ခ် ကူကူရီလာ၊ အီဘရာဟီမာ ကိုနတေး၊ ဘာနာဒို ဆေးလ်ဗားနဲ့ ဒန်ဇဲလ် ဒမ်းဖရီးစ် တို့လို ကစားသမားသစ်တွေ အပါအဝင် တစ်သင်းလုံးကို မော်ရင်ညို အနေနဲ့ စည်းလုံးအောင် လုပ်နိုင်ခဲ့ရင်တောင်မှ ရှေ့တန်းက အမ်ဘာပေးကို အသုံးချပြီး ပွဲကို အနိုင်ရအောင် ဘယ်လို ကစားမလဲ ဆိုတဲ့ မေးခွန်းက ရှိနေဆဲပါ။
ပြင်သစ် ကြယ်ပွင့်ဟာ ရီးရဲလ်မက်ဒရစ် ဂျာစီ ဝတ်ဆင်ခဲ့တဲ့ နှစ်ရာသီ အတွင်းမှာ ၈၆ ဂိုးအထိ သွင်းယူပေးထားနိုင်တဲ့ ဂိုးသွင်းစက် ဖြစ်နေတာတော့ ငြင်းမရပါဘူး။ သူရောက်လာကတည်းက အသင်းမှာ ဂိုးအများဆုံး သွင်းထားနိုင်သူ ဖြစ်ပေမယ့် ရီးရဲလ် ကတော့ အဓိက ဖလားကြီးတွေကို လွဲချော်နေခဲ့ရပါတယ်။ တိုက်တိုက်ဆိုင်ဆိုင်ပဲ အမ်ဘာပေး မရောက်ခင် ရာသီက ဗင်နီးစီးယပ်စ် ဂျူနီယာ ဦးဆောင်တဲ့ တိုက်စစ်နဲ့ လော့စ်ဘလန်ကို့စ် တို့ဟာ လာလီဂါ၊ ချန်ပီယံလိဂ်နဲ့ စပိန်စူပါဖလားတွေကို သိမ်းပိုက်နိုင်ခဲ့တာပါ။ အခုနောက်ပိုင်း နှစ်နှစ်အတွင်းမှာတော့ ဘရာဇီးလ် ကြယ်ပွင့် ဗင်နီးစီးယပ်စ်ဟာ အမ်ဘာပေးနဲ့ ကွင်းတွင်း တွဲဖက်ညီမှု ရဖို့ အတော်လေး ရုန်းကန်နေရပါတယ်။ ဒီစူပါစတား နှစ်ယောက်စလုံးဟာ ဘယ်တောင်ပံ နေရာလွတ် ကိုပဲ အဓိက အပြိုင်လုချင်နေကြပြီး တစ်ယောက် မရှိတဲ့ အချိန်မှာ ကျန်တဲ့ တစ်ယောက်က ပိုပြီး ခြေစွမ်းပြနိုင်တာမျိုး ဖြစ်နေပါတယ်။
လက်ရှိ ကမ္ဘာ့ဖလားပွဲစဉ်တွေမှာ သူတို့ သက်ဆိုင်ရာ နိုင်ငံလက်ရွေးစင် အသင်းတွေ အတွက် ကစားပေးနေတာကို ကြည့်ရင် သိနိုင်ပါတယ်။ အမ်ဘာပေးရော ဗင်နီးစီးယပ်စ်ပါ ၄ ဂိုးစီ သွင်းယူထားပြီး ရွှေဖိနပ်ဆု အတွက် ပြိုင်ဆိုင်နေကြတာပါ။ ဒါပေမယ့် ရီးရဲလ်မက်ဒရစ်ရဲ့ အရေးကြီးဆုံး ပွဲကြီးပွဲကောင်းတွေမှာ ဆိုရင်တော့ သူတို့ နှစ်ယောက်ကြား ချိတ်ဆက်မှု အားနည်းပြီး ဂိုးပေါက်ပျောက်ဆုံးလေ့ ရှိပါတယ်။
အန်ဆယ်လော့တီ၊ ဇာဗီ အလွန်ဆိုနဲ့ အာဘီလိုအာ တို့လို မန်နေဂျာတွေ အားလုံးဟာ ဒီတိုက်စစ်မှူး နှစ်ယောက်ကို တစ်ယောက်နဲ့ တစ်ယောက် အားဖြည့်ပေးနိုင်မယ့် အတွဲအဖက် ဖြစ်အောင် လုပ်ဖို့ ကြိုးစားရင်း ကျရှုံးခဲ့ကြပြီးပါပြီ။ မော်ရင်ညို ကတော့ ဒီပြဿနာကို ဖြေရှင်းဖို့ နောက်ထပ် ကြိုးစားရမယ့်သူ ဖြစ်လာပါတယ်။ အကယ်၍ အမ်ဘာပေးနဲ့ ဗင်နီ တို့သာ တကယ့် အားကိုးရတဲ့ အတွဲအဖက် တစ်ခု ဖြစ်မလာဘူး ဆိုရင်တော့ ရီးရဲလ်မက်ဒရစ်ဟာ နောက်ထပ် ပျင်းရိငြီးငွေ့စရာ ကောင်းပြီး စိတ်ပျက်စရာ ရာသီတစ်ခုကို ထပ်မံ ရင်ဆိုင်ရဦးမှာ အသေအချာပါပဲ။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
