တော့တင်ဟမ်ဟော့စပါးတို့ ပရီးမီးယားလိဂ် ကနေ တန်းဆင်းရမယ့် အန္တရာယ်နဲ့ ရင်ဆိုင်နေရခြင်းက ကစားသမားတွေရဲ့ ခြေစွမ်း အပေါ် သက်ရောက်မှု ရှိနေကြောင်း နည်းပြသစ် ရော်ဘတ်တို ဒီဇာဘီက ဝန်ခံ ပြောကြားခဲ့ပါတယ်။ ဒီဇာဘီက စပါး အနေနဲ့ တန်းဆင်းဇုန် ကနေ လွတ်မြောက်နိုင်မယ်လို့ အကောင်းမြင်နေဆဲ ဖြစ်ပေမယ့်လည်း တန်းဆင်းဇုန်နဲ့ နီးကပ်နေတဲ့ ဖိအားတွေက ကစားသမားတွေရဲ့ စိတ်ဓာတ်ပိုင်းကို ထိခိုက်နေတယ်လို့ ဆိုခဲ့ပါတယ်။
ဒီဇာဘီရဲ့ ပထမဆုံး ပွဲစဉ် အဖြစ် ဆန်းဒါးလန်းနဲ့ ကစားခဲ့ရာမှာ စပါးက ၁-၀ နဲ့ ရှုံးနိမ့်ခဲ့ပါတယ်။ ဆန်းဒါးလန်း အတွက် အနိုင်ဂိုးကို ပွဲကစားချိန် ၆၁ မိနစ်မှာ နော်ဒီ မူကီလီက သွင်းယူပေးခဲ့တာ ဖြစ်ပါတယ်။ စပါး အသင်းရဲ့ နောက်ဆုံး နည်းပြ နှစ်ဦးစလုံး (ဖေဖော်ဝါရီလက အာဆင်နယ်နဲ့ ပွဲမှာ အီဂေါ တူဒါနဲ့ အခုပွဲမှာ ဒီဇာဘီ) ဟာ သူတို့ရဲ့ ပထမဆုံး ပွဲဦးထွက်မှာတင် ရှုံးနိမ့်ခဲ့ကြတာပါ။
ဒီနည်းပြ နှစ်ဦး မတိုင်ခင်က နည်းပြ ၉ ဦး ကတော့ ပွဲဦးထွက်မှာ ရှုံးနိမ့်ဖူးခြင်း မရှိဘဲ ၆ ပွဲနိုင် ၃ ပွဲ သရေ ရလဒ်တွေ ရရှိခဲ့ဖူးပါတယ်။ ဒီရှုံးပွဲဟာ စပါး အတွက် ဒီရာသီရဲ့ ၁၆ ကြိမ်မြောက် ရှုံးပွဲ ဖြစ်ပြီး ဇယား အဆင့် ၁၈ နေရာမှာ ဆက်လက် ရပ်တည်နေကာ ပထမဆုံးအကြိမ် အဖြစ် တန်းဆင်းဇုန် အတွင်းသို့ ရောက်ရှိသွားခဲ့တာ ဖြစ်ပါတယ်။
ရာသီကုန်ဖို့ ၆ ပွဲသာ ကျန်တော့ချိန်မှာ တန်းဆင်းဇုန် ပြင်ပနေရာနဲ့ ၂ မှတ် အကွာကို ရောက်ရှိနေပြီး ချန်ပီယံရှစ်သို့ တန်းဆင်းရတော့မယ့် အခြေအနေက ကစားသမားတွေရဲ့ စိတ်ထဲမှာ လေးလံတဲ့ ဝန်ထုပ်ဝန်ပိုး ဖြစ်နေတယ်လို့ ဒီဇာဘီက ယုံကြည်နေပါတယ်။
စပါးရဲ့ ပြဿနာတွေက ပရီးမီးယားလိဂ် တန်းဆင်းဇုန် တိုက်ပွဲကြောင့်လားလို့ မေးမြန်းရာမှာ ဒီဇာဘီက “ကျွန်တော် အဲ့ဒီလိုပဲ ထင်ပါတယ်။ ကျွန်တော့် အသက်က ၄၆ နှစ် ရှိပါပြီ။ ကစားသမားတွေထက် အတွေ့အကြုံ အများကြီး ရှိသလို အကောင်းမြင်စိတ်လည်း အပြည့် ရှိပါတယ်။ ဒါက ကျွန်တော် တို့ဟာ စပါး အသင်း ဖြစ်နေလို့ ဒါမှမဟုတ် အကောင်းမြင်ပြနေရမှာ မို့လို့ မဟုတ်ပါဘူး။ ကစားသမားတွေရဲ့ အရည်အချင်းကို သိလို့ပါ။ သူတို့မှာ ပွဲတစ်ပွဲကို အနိုင်ရဖို့ အရည်အချင်းရှိပါတယ်။ အခုလောလောဆယ် ကျွန်တော် တို့ရဲ့ အနီးကပ်ဆုံး ပစ်မှတ်က ပွဲတစ်ပွဲကို အရင်နိုင်ဖို့ပါပဲ။ တစ်ပွဲလောက် နိုင်သွားရင် အရာရာကို ကွဲပြားတဲ့ အမြင်နဲ့ မြင်နိုင်လာပါလိမ့်မယ်။” လို့ ဖြေကြားခဲ့ပါတယ်။
ဆက်လက်ပြီး သူက “လေ့ကျင့်ရေးရက်တွေမှာ သူတို့ရဲ့ ခေါင်းထဲမှာ ဘာမှမရှိဘဲ ရှင်းလင်းနေတော့ ပိုကောင်းအောင် ကစားနိုင်ကြပေမယ့် ပွဲကစားချိန် မှာတော့ အခြေအနေက သေချာပေါက် ကွဲပြားသွားပါတယ်။ ကျွန်တော့် အလုပ်က လေ့ကျင့်ရေးမှာ သူတို့ လုပ်ပြနိုင်တာတွေကို ပွဲထဲ မှာလည်း လုပ်ပြနိုင်အောင် စိတ်ဓာတ်ပိုင်းဆိုင်ရာ ယုံကြည်မှု တည်ဆောက်ပေးဖို့ပါပဲ။” လို့ ဆိုပါတယ်။
Opta စူပါကွန်ပျူတာရဲ့ တွက်ချက်မှုအရ စပါး အသင်း ပရီးမီးယားလိဂ် ကနေ တန်းဆင်းရနိုင်ခြေ ၄၆.၁ ရာခိုင်နှုန်း အထိ အခွင့်အရေး ရှိနေပြီး အဆင့် ၁၈ နဲ့ ရာသီသိမ်းဖို့ ၄၅.၉ ရာခိုင်နှုန်း သေချာနေပါတယ်။ စပါးဟာ နောက်ဆုံး ၁၄ ပွဲ ဆက်တိုက် နိုင်ပွဲ ပျောက်ဆုံးထားပြီး (၅ ပွဲ သရေ၊ ၉ ပွဲ ရှုံး)၊ အသင်း သမိုင်းတစ်လျှောက် ဒုတိယမြောက် အရှည်ကြာဆုံး နိုင်ပွဲ ပျောက်ဆုံးမှု စံချိန်ဆိုး ဖြစ်နေပါတယ်။ (အရှည်ကြာဆုံး ကတော့ ၁၉၃၄-၃၅ ခုနှစ်က ၁၆ ပွဲဆက် ဖြစ်ပါတယ်)။
သမိုင်းကြောင်းအရ စပါးက ၁၉၇၆-၇၇ ရာသီ နောက်ပိုင်း အဆင့်မြင့်တန်းလိဂ် ကနေ တန်းဆင်းရဖူးခြင်း မရှိသေးပါဘူး။ ဒါ့အပြင် စပါး အသင်းခေါင်းဆောင် ခရစ္စတီယန် ရိုမီယို ကတော့ ဂိုးသမား အန်တိုနင် ကင်စကီးနဲ့ တိုက်မိပြီး ဒူးဒဏ်ရာရရှိကာ မျက်ရည်တွေနဲ့ ကွင်းအတွင်း ကနေ ထွက်ခွာသွားခဲ့ရပါတယ်။
ရိုမီယိုရဲ့ ဒဏ်ရာနဲ့ ပတ်သက်ပြီးတော့ ဒီဇာဘီက “လာမယ့် ရက်တွေမှာ စောင့်ကြည့်ရပါမယ်။ သူဟာ ကျွန်တော်တို့ အတွက် အရေးပါတဲ့ ကစားသမားမို့ ဒဏ်ရာ မပြင်းထန်ဖို့ မျှော်လင့်ပါတယ်။ ကျွန်တော် တို့ရဲ့ ပစ်မှတ်ကို အရောက်လှမ်းဖို့ သူ လိုအပ်ပါတယ်။” လို့ ပြောကြားသွားခဲ့ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
