စတန်းဖို့ဒ်ဘရစ်ချ်မှာ ကစားခဲ့တဲ့ ပရီးမီးယားလိဂ် ပွဲစဉ် မှာတော့ နယူးကာဆယ်က ချဲလ်ဆီးကို အန်သိုနီ ဂေါ်ဒွန်ရဲ့ တစ်လုံးတည်းသော သွင်းဂိုးနဲ့ အနိုင်ရသွားခဲ့ပါတယ်။ ချဲလ်ဆီး ကတော့ အိမ်ကွင်းမှာ သုံးပွဲ ဆက်တိုက် နိုင်ပွဲ ပျောက်ဆုံးခဲ့ကာ ချန်ပီယံလိဂ် ဝင်ခွင့် အတွက် ရုန်းကန်ရမယ့် အခြေအနေနဲ့ ရင်ဆိုင်လိုက်ရပြီလည်း ဖြစ်ပါတယ်။
အင်္ဂလန် လက်ရွေးစင် ဂေါ်ဒွန်ဟာ ပြီးခဲ့တဲ့ အင်္ဂါနေ့က ဘာစီလိုနာနဲ့ ချန်ပီယံလိဂ် ပွဲစဉ်မှာ ဖျားနာမှုကြောင့် လူစားဝင် ကစားသမား အဖြစ်သာ ပါဝင်ခဲ့ရပေမယ့် အခုပွဲမှာတော့ အကောင်းဆုံး ပုံစံ တစ်ခုကို ပြသသွားခဲ့တာ ဖြစ်ပါတယ်။
ပွဲစဉ်အကျဉ်း
ပွဲစပြီး ၁၈ မိနစ်မှာတင် နယူးကာဆယ်တို့ ဦးဆောင်ဂိုး ရရှိခဲ့ပါတယ်။ တီနို လစ်ဗရာမန်တိုဟာ ချဲလ်ဆီး ခံစစ်ကို အလွယ်တကူ ထိုးဖောက်ပြီး ဂျိုး ဝေးလ်လော့ခ်ဆီ ပေးပို့ခဲ့ရာ ကနေ တဆင့် အန်သိုနီ ဂေါ်ဒွန်က ဂိုးအဖြစ် အဆုံးသတ်ပေးခဲ့တာပါ။ နယူးကာဆယ် ဘက်က ထောင့်ကန်ဘော တစ်ကြိမ်မှာ မာလစ် သီယော ကို ရိစ် ဂျိမ်းစ် က ဖျက်ထုတ်ပုံကြောင့် ပင်နယ်တီ ရသင့်တယ်လို့ ယူဆခဲ့ပေမယ့် ဒိုင်လူကြီးက ခွင့်မပြုခဲ့ပါဘူး။ (ရိစ် ဂျိမ်းစ် ဟာ ပြီးခဲ့တဲ့ သောကြာနေ့ကမှ ချဲလ်ဆီးနဲ့ စာချုပ်သစ် ချုပ်ဆိုထားတာ ဖြစ်ပါတယ်။)
ဒုတိယပိုင်းမှာ ချဲလ်ဆီး နည်းပြ လီယမ် ရိုစီနီယာက မာလို ဂူစတို အစား တိုက်စစ်မှူး လီယမ် ဒီလက်ပ်ကို လူစားလဲပြီး အားဖြည့်ခဲ့ပါတယ်။ ကိုးလ် ပါးလ်မားရဲ့ ပင်နယ်တီ တောင်းဆိုမှုနဲ့ ကူကူရယ်လာရဲ့ လက်ထိဘော တောင်းဆိုမှုတွေကို ဒိုင်လူကြီးက ပယ်ချခဲ့ပါတယ်။ လီယမ် ဒီလက်ပ် အပိုင်အခွင့်အရေး ရခဲ့ပေမယ့် အသုံးမချနိုင်ခဲ့သလို၊ အသင်းခေါင်းဆောင် ရိစ် ဂျိမ်းစ်ရဲ့ ၂၅ ကိုက် အကွာ အလွတ်တည်ကန်ဘော ကလည်း ဂိုးတိုင်ထိထွက်သွားခဲ့လို့ ချဲလ်ဆီးတို့ ချေပဂိုးနဲ့ လွဲချော်ခဲ့ရပါတယ်။
ပွဲပြီးအချက်အလက်နဲ့ မှတ်တမ်းများ
ချဲလ်ဆီးဟာ လိဒ်စ်ယူနိုက်တက်၊ ဘန်လေ တို့နဲ့ အိမ်ကွင်းမှာ သရေကျခဲ့ပြီးနောက် အခု နယူးကာဆယ် ကိုပါ ရှုံးနိမ့်ခဲ့တာကြောင့် ၂၀၂၃ ခုနှစ် နောက်ပိုင်း ပထမဆုံးအကြိမ် အဖြစ် အိမ်ကွင်း ၃ ပွဲ ဆက်တိုက် နိုင်ပွဲ ပျောက်ဆုံးခဲ့တာ ဖြစ်ပါတယ်။
ချဲလ်ဆီးဟာ တစ်ပွဲလုံးမှာ ဂိုးကန်သွင်းမှု ၂၂ ကြိမ် အထိ ရှိခဲ့ပေမယ့် မျှော်မှန်းဂိုး (xG) ၁.၄၃ သာ ရှိခဲ့ပြီး ဂိုးပေါက်တည့်မှု ၃ ကြိမ်သာ ရှိခဲ့တာကြောင့် တိုက်စစ်ပိုင်း ထိရောက်မှု အားနည်းခဲ့တာကို တွေ့ရပါတယ်။ အန်သိုနီ ဂေါ်ဒွန်ဟာ ချဲလ်ဆီးနဲ့ တွေ့ဆုံချိန်တိုင်း ခြေစွမ်းပြလေ့ ရှိပြီး ပရီးမီးယားလိဂ်မှာ ချဲလ်ဆီး ဘက်ကို ဂိုးပါဝင် ပတ်သက်မှု ၆ ကြိမ် (၃ ဂိုးသွင်း၊ ၃ ဂိုးဖန်တီး) အထိ ရှိလာခဲ့ပါပြီ။ ဒါဟာ စပါးနဲ့ အတူ ဂေါ်ဒွန် အတွက် ဂိုးအများဆုံး ပါဝင်ပတ်သက်ထားတဲ့ အသင်းတွေ ဖြစ်ပါတယ်။
ဒီရလဒ်ကြောင့် ချဲလ်ဆီးဟာ ဒီကနေ့ည ပွဲစဉ် ရလဒ်တွေ အပေါ် မူတည်ပြီး ပရီးမီးယားလိဂ် အမှတ်ပေးဇယား အဆင့် ၆ အထိ ဆင်းသွားရဖို့ အထိ ရှိနေပါတယ်။ တဖက်မှာ နယူးကာဆယ် ကတော့ ချန်ပီယံလိဂ် ဝင်ခွင့် အတွက် အဓိက တိုက်ပွဲဝင်နေတဲ့ ယူနိုက်တက်နဲ့ ချဲလ်ဆီးကို နှစ်ပတ် ဆက်တိုက် အနိုင်ယူခဲ့ပြီး သူတို့လည်းပဲ ဥရောပ ဝင်ခွင့် တစ်နေရာ အတွက် မျှော်လင့်ချက် ရှိလာပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
