မန်ချက်စတာယူနိုက်တက်က ညက ကစားသွားတဲ့ ပရီးမီးယားလိဂ် ပွဲစဉ်မှာ အဲဗာတန်ကို ဘင်ဂျာမင် ဆက်စ်ကိုရဲ့ တစ်လုံးတည်းသော သွင်းဂိုးနဲ့ အနိုင်ရသွားခဲ့ပါတယ်။ ဆက်စ်ကို ကတော့ လူစားဝင် ကစားသမား အဖြစ် အသင်း အတွက် အရေးပါတဲ့ ဂိုးတွေ သွင်းယူပေးနေပြီး နည်းပြ မိုက်ကယ် ကာရစ် ကလည်း ဆက်စ်ကို အနေနဲ့ နောင်နှစ်ပေါင်းများစွာ အထိ အသင်းရဲ့ အဓိက ကစားသမား ဖြစ်လာလိမ့်မယ်လို့ ဟောကိန်းထုတ်လိုက်ပါတယ်။
မန်ချက်စတာယူနိုက်တက် တိုက်စစ်မှူး ဘင်ဂျာမင် ဆက်စ်ကိုဟာ ညက ပွဲမှာ Super-sub အဖြစ် အစွမ်းပြခဲ့ပြီးနောက် နည်းပြ မိုက်ကယ် ကာရစ်ခ်က ဆလိုဗေးနီးယားသားက အသင်းရဲ့ အဓိက ဒေါက်တိုင် ဖြစ်လာလိမ့်မယ်လို့ ပြောကြားခဲ့ပါတယ်။ ပြီးခဲ့တဲ့ ရက်သတ္တပတ်တွေက ဖူလ်ဟမ်၊ ဝက်စ်ဟမ်း တို့နဲ့ ပွဲစဉ်တွေမှာ လူစားဝင်ပြီး ရလဒ်တွေကို ပြောင်းလဲစေမယ့် ဂိုးတွေ သွင်းယူပေးခဲ့တဲ့ ဆက်စ်ကိုဟာ ညက ပွဲမှာလည်း အသင်း အတွက် အရေးပါတဲ့ ပံ့ပိုးမှု တစ်ခု ထပ်မံ လုပ်ဆောင်နိုင်ခဲ့ပြန်ပါတယ်။
ဒီပွဲရဲ့ ပွဲကစားချိန် ၇၁ မိနစ်မှာ မားသီးယပ်စ် ကူညာနဲ့ ဘရိုင်ယန် အမ်ဘွေမို တို့ရဲ့ ဖန်တီး ကနေ တစ်ဆင့် တန်ပြန် တိုက်စစ်ကို အဆုံးသတ်ကာ အနိုင်ဂိုး သွင်းယူပေးခဲ့တာကြောင့် ယူနိုက်တက်က အဲဗာတန်ကို ၁-၀ ဂိုးနဲ့ အနိုင်ရရှိခဲ့ပါတယ်။ လိုက်ပ်ဇစ် ကနေ ပြောင်းရွှေ့လာပြီးနောက် ပထမဆုံး ၁၇ ပွဲမှာ ၂ ဂိုးသာ သွင်းနိုင်ခဲ့ပေမယ့်လည်း၊ နောက်ဆုံး ကစားခဲ့တဲ့ ပြိုင်ပွဲစုံ ၇ ပွဲ မှာတော့ ၆ ဂိုး အထိ သွင်းယူထားနိုင်ခဲ့ပါတယ်။ ဆက်စ်ကိုဟာ ဒီရာသီ ပရီးမီးယားလိဂ်မှာ လူစားဝင် ကစားသမား အဖြစ် ၃ ဂိုး သွင်းယူထားပါတယ်။ ဒါဟာ အီမီလီယာနို ဘူအန်ဒီယာ၊ ဂျူနီယာ ခရော့ပီ၊ ဆင်မြူရယ် ချူကွီဇီ တို့နဲ့ အတူ လူစားဝင်ပြီး ဂိုးအများဆုံး သွင်းထားတဲ့ ကစားသမား အဖြစ် ရပ်တည်နေသည်။
Sky Sports နဲ့ အင်တာဗျူးမှာ နည်းပြ မိုက်ကယ် ကာရစ်ခ်က “သူအခု အရမ်းကောင်းတဲ့ အခြေအနေမှာ ရှိနေပါတယ်။ သူနဲ့ ကျွန်တော်တို့ သေချာ စကားပြောထားပြီးသားပါ။ ဒီမှာ ကစားသမား တစ်ယောက် အနေနဲ့ ဖွံ့ဖြိုးလာဖို့ စိတ်ရှည်ဖို့က အရေးကြီးတယ် ဆိုတာ သူနားလည်ပါတယ်။ သူဟာ အသင်း အတွက် နောင်နှစ်ပေါင်း များစွာ အထိ အားကိုးရမယ့် ကစားသမားကြီး ဖြစ်လာမှာပါ။” လို့ ပြောကြားခဲ့ပါတယ်။
ပွဲကစားချိန် ၅၈ မိနစ်မှာ အာမက်ဒ် ဒီယာလို အစား လူစား ဝင်လာတဲ့ အသက် ၂၂ နှစ် အရွယ် ဆက်စ်ကိုက ပြိုင်ဘက် ဧရိယာအတွင်း ဘောလုံးထိချက် (၃) ကြိမ် ရရှိခဲ့ပါတယ်။ ၎င်းက Sky Sports ကို ပြောကြားရာမှာ “ကျွန်တော့် အတွက် ကတော့ ၅ မိနစ် ကစားရစေ၊ မိနစ် ၉၀ ကစားရစေ အသင်းကို ကူညီပေးနိုင်ဖို့က အဓိကပါ။ ကျွန်တော့်ကို ကျွန်တော် ယုံကြည်သလို အသင်းဖော်တွေ ကလည်း ကျွန်တော့် အပေါ် ယုံကြည်ကြပါတယ်။” လို့ ဆိုပါတယ်။
အခုနိုင်ပွဲကြောင့် ယူနိုက်တက်ဟာ ပရီးမီးယားလိဂ် အမှတ်ပေးဇယား အဆင့် ၄ အတွင်းကို ပြန်လည် ရောက်ရှိလာခဲ့ပါတယ်။ နည်းပြ မိုက်ကယ် ကာရစ်ခ်ဟာ အသင်းကို ၂ ကြိမ် တာဝန်ယူ ကိုင်တွယ်ခဲ့ရာမှာ ၉ ပွဲ ကစား၊ ၇ ပွဲ နိုင်၊ ၂ ပွဲ သရေနဲ့ ရှုံးပွဲမရှိသေးပါဘူး။ မန်ချက်စတာယူနိုက်တက် သမိုင်းမှာ ပထမဦးဆုံး ရှုံးပွဲ မတွေ့ခင် ပွဲအများဆုံး ကိုင်တွယ်နိုင်တဲ့ နည်းပြတွေဟာ အိုလီဂန်နာ ဆိုးလ်ရှား (၁၁ ပွဲ) နဲ့ ဟားဘတ် ဘမ်လက် (၁၀ ပွဲ) တို့သာ ရှိတာကြောင့် ကာရစ်ခ်ရဲ့ မှတ်တမ်း မှာလည်း အားရစရာ ဖြစ်နေပါတယ်။
“အခုပွဲမှာ ကစားသမားတွေရဲ့ စိတ်ဓာတ်၊ ပေးဆပ်မှုနဲ့ တစ်ယောက် အတွက် တစ်ယောက် အလုပ်အကျွေးပြုလိုတဲ့ စိတ်ထားတွေကို မြင်တွေ့ခဲ့ရပါတယ်။ ပွဲပြီးခါနီးမှာ ခံစစ်ကို အတူတူ ပိတ်ဆို့ ကစားခဲ့ကြတာဟာ ကျွန်တော်တို့ အတွက် ကြီးမားတဲ့ နိုင်ပွဲ တစ်ခုပါပဲ။” လို့ ကာရစ်က ပွဲအပြီးမှာ ဝမ်းသာ အားရ ပြောကြားခဲ့ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
